Trolls On Shardul Thakur: ఇదేమి బౌలింగ్‌రా బాబు.. ఇతడితోనా వరల్డ్‌కప్‌ ఆడేది! రోహిత్‌ సపోర్ట్‌తోనే!!

సాక్షి, హైదరాబాద్‌: అమెరికాలో ఉన్న వ్యాపార అవకాశాలన్నీ తెలంగాణలోనూ ఉన్నాయని, చైనాకు ప్రత్యామ్నాయంగా ఎదగాలనేది తమ సంకల్పమని సీఎం రేవంత్‌రెడ్డి చెప్పారు. తెలంగాణను వ్యాపారానికి, పెట్టుబడులకు గమ్యస్థానంగా మార్చేందుకు సులభతర విధానాలతో కూడిన కొత్త పారిశ్రామిక పాలసీని రూపొందిస్తు న్నామన్నారు. తెలంగాణలో పెట్టుబడులకు ఉన్న అపార అవకాశాలను ఒడిసి పట్టేలా కొత్త పారిశ్రామిక విధానం ఉంటుందన్నారు. అమెరికా పర్యటనలో ఉన్న సీఎం.. న్యూయార్క్‌లోని కాన్సులేట్‌ జనరల్‌ ఆఫ్‌ ఇండియా ఆధ్వర్యంలో వివిధ రంగాలకు చెందిన పారిశ్రామికవేత్తలతో జరిగిన రౌండ్‌టేబుల్‌ సమావేశంలో పాల్గొన్నారు. ఫార్మా, ఐటీ, టెక్నాలజీ, ఈవీ,బయోటెక్, షిప్పింగ్‌ రంగాల్లో పేరొందిన కంపెనీలకు చెందిన చైర్‌పర్సన్లు, సీఈఓలను ఉద్దేశించి మాట్లాడారు. భారత భవిష్యత్తు చిరునామాగా ‘ఫ్యూచర్‌ సిటీ’హైదరాబాద్‌లో నాలుగో నగరంగా, దేశంలోనే తొలి జీరో కార్బన్‌ సిటీగా నిర్మించ తలపెట్టిన ‘ఫ్యూచర్‌ సిటీ’ భారత భవిష్యత్తుకు చిరునామాగా నిలుస్తుందని రేవంత్‌ పేర్కొన్నారు. ఈ ఫ్యూచర్‌ సిటీ రాష్ట్ర అభివద్ధికి దోహదపడటంతో పాటు పరిశ్రమలకు సిరుల పంట పండిస్తుందన్నారు. ఇందులో ఏఐ హబ్‌తో పాటు, మెడికల్, టూరిజం, స్పోర్ట్స్, సాఫ్ట్‌వేర్, ఫార్మా విలేజ్‌ను అభివృద్ధి చేస్తామని చెప్పారు. ఇప్పటికే సాఫ్ట్‌వేర్, లైఫ్‌ సైన్సెస్, ఫార్మా రంగాల్లో తెలంగాణ అగ్రగామిగా ఉందన్నారు. ఏరోస్పేస్, డిఫెన్స్, ఎలక్ట్రానిక్స్‌ తదితర రంగాలలో బలమైన పునాదులు వేసుకుందని తెలిపారు. కోవిడ్‌ను అధిగమించేందుకు మిలియన్ల కొద్దీ వ్యాక్సిన్‌లను తయారు చేయడం ద్వారా ప్రపంచానికి హైదరాబాద్‌ సాయం చేసిందని ముఖ్యమంత్రి చెప్పారు. వీలైనన్ని పెట్టుబడుల ఆకర్షణే లక్ష్యంముఖ్యమంత్రి హోదాలో తొలిసారిగా అమెరికాలో పర్యటిస్తున్న తాను వీలైనన్ని పెట్టుబడులు తెలంగాణకు తీసుకెళ్లడమే లక్ష్యంగా పెట్టుకున్నానని సీఎం తెలిపారు. నిజాంలు నిర్మించిన 425 సంవత్సరాల పురాతనమైన హైదరాబాద్, ఇంచుమించుగా యునైటెడ్‌ స్టేట్స్‌ ఆఫ్‌ అమెరికాతో సమకాలీనంగా ఉండటం ఆసక్తి రేపుతోందన్నారు. ప్రపంచ పారిశ్రామికవేత్తలందరూ హైదరాబాద్‌కు వస్తే అనుకూలతలు, పెట్టుబడులపై చర్చించేందుకు తమ ప్రభుత్వం సిద్ధంగా ఉందని అన్నారు. హైదరాబాద్‌తో పాటు రాష్ట్రాన్ని పారిశ్రామిక క్లస్టర్లుగా విభజించి అభివృద్ధి చేయడానికి సంబంధించిన భవిష్యత్తు ప్రణాళికలపై సీఎం ప్రెజెంటేషన్‌ ఇచ్చారు. తెలంగాణను చైనాకు ప్రత్యామ్నాయ కేంద్రంగా తీర్చిదిద్దాలనే ముఖ్యమంత్రి దార్శనికతను ఐటీ శాఖ మంత్రి శ్రీధర్‌బాబు పారిశ్రామికవేత్తలకు వివరించారురూ.1,000 కోట్లతో స్వచ్ఛ్‌ బయో ఫ్యూయల్‌ ప్లాంట్‌ బయో ఫ్యూయల్స్‌ తయారీ సంస్థ స్వచ్ఛ్‌ బయో తెలంగాణలో సెకండ్‌ జనరేషన్‌ సెల్యులోసిక్‌ బయో ఫ్యూయల్‌ ప్లాంట్‌ నెలకొల్పనుంది. మొదటి దశలో సుమారు రూ.1,000 కోట్ల పెట్టుబడితో ఈ ప్లాంట్‌ నిర్మించనుంది. ఈ ప్లాంట్‌ ఏర్పాటుతో 250 మందికి ప్రత్యక్షంగా, 250 మందికి పరోక్షంగా ఉద్యోగాలు లభిస్తాయి. సీఎం రేవంత్‌రెడ్డి, మంత్రి శ్రీధర్‌బాబు బృందంతో స్వచ్ఛ్‌ బయో చైర్‌ పర్సన్‌ ప్రవీణ్‌ పరిపాటి ఈ మేరకు చర్చలు జరిపారు.

న్యూయార్క్‌:అమెరికా అధ్యక్ష ఎన్నికల్లో డొమోక్రటిక్‌ పార్టీ అధ్యక్ష అభ్యర్థిగా ఇండో అమెరికన్‌ కమలా హారిస్‌ ఖరారై.. ప్రచారంలో దూసుకువెళ్తుతున్నారు. తాజా డెమోక్రటిక్‌ పార్టీ తరఫున ఉపాధ్యక్ష అభ్యర్థిగా మిన్నెసొటా గవర్నర్‌ టిమ్‌వాల్ట్స్‌ ఎంపికయ్యారు. అధ్యక్ష రేసులో ఉన్న కమలా హారిస్‌.. తమ పార్టీ వైస్‌ ప్రెసిడెంట్‌ అభ్యర్థిగా వాల్ట్స్‌ను ఎంపిక చేసినట్లు తెలుస్తోంది. అయితే దీనిపై డెమోక్రటిక్‌ పార్టీ నుంచి అధికారిక ప్రకటన వెలువడాల్సి ఉంది.అమెరికా చట్టసభలో 12 ఏళ్లపాటు సేవలందించిన టిమ్‌వాల్ట్స్‌ 2018లో మిన్నెసొటా గవర్నర్‌గా ఎన్నికయ్యారు. అమెరికా ఆర్మీ నేషనల్‌ గార్డ్‌లో 20 ఏళ్ల పాటు పనిచేశారు. అదేవిధంగా టిమ్‌వాల్ట్స్‌ తనదైన వ్యూహాలతో రిపబ్లికన్‌ పార్టీ, అధ్యక్ష అభ్యర్థి డొనాల్డ్‌ ట్రంప్‌, ఉపాధ్యక్ష అభ్యర్థి జేడీ వాన్స్‌లపై విమర్శలు గుప్పించటంతో అందరిని ఆకర్షించారు. మరోవైపు.. అధ్యక్ష ఎన్నికల్లో కమలా హారిస్‌ విజయం సాధిస్తారని అన్ని సర్వేలు నివేదికలు వెల్లడిస్తున్నాయి. మరోవైపు.. ఆదివారం సీబీఎస్‌ న్యూస్‌/యూగవ్‌ సంస్థ చేపట్టిన సర్వేలో కమలా హరీస్‌ ఆధిక్యం కనబరిచారు. ట్రంప్‌ అధ్యక్ష పదవిలో మానసికంగా స్థిమితంగా ఆలోచించగలరని 51 శాతం మంది, కమల మెరుగ్గా పరిపాలించగలరని 64 శాతం చెప్పారు.

ఆధునాతన వైద్య విధానం కొంత పుంతలు తొక్కుతోంది. దీనికి తోడు ఏఐ సాంకేతికత ఆరోగ్య నిర్వహణను వేగవంతంగా, మరింత సమర్థవంతంగా మార్చింది. అందుకు ఉదహారణ ఈ రియల్‌ ఐరన్‌ మ్యాన్‌. ఎంతలా వైద్య విధానం అభివృద్ధి చెందుతున్నా.. అవయవమార్పిడి విషయంలో దాతల కొరత వైద్యులను వేదిస్తున్న ప్రధాన సమస్య. దీన్ని నివారించేందుకు ఎన్నో ఏళ్లుగా పరిశోధనలు సాగుతూనే ఉన్నాయి. ఐతే కొన్ని ప్రధాన అవయవాలైన గుండె, మూత్రపిండాలు వంటి వాటిల్లో కృత్రిమ అవయవాలు ఎంత వరకు పనిచేస్తాయనేది ధర్మసందేహంగా ఉండేది. అది ఈ వ్యక్తికి విజయవంతంగా అమర్చిన కృత్రిమ గుండెతో వైద్యుల మదిలో మెదిలిన ఎన్నో ప్రశ్నలకు సమాధానాలు దొరికేలా చేసింది. కొత్త ఆశలను రేకెత్తించింది. నిజ జీవిత ఐరన్‌ మ్యాన్‌గా పిలిచే ఆ వక్తి కథ ఏంటో చూద్దామా..!అమెరికాకు చెందిన 58 ఏళ్ల వ్యక్తి ఎండ్-స్టేజ్ హార్ట్ ఫెయిల్యూర్‌తో బాధపడుతున్నాడు. అయితే గుండె ఇచ్చే దాతలు అందుబాటులో లేకపోవడంతో టైటానియంతో తయారు చేసిన గుండెను అమర్చారు వైద్యులు. ప్రపంచంలోనే ఇలా కృత్రిమ గుండెను పొందిన తొలి వ్యక్తి అతడే. అంతేగాదు ప్రస్తుతం అతడిని రియల్‌ ఐరన్‌ మ్యాన్‌గా పిలుచుకుంటున్నారు అంతా. ఇది ఒకరకంగా వైద్యరంగంలో విప్లవాత్మక మార్పు ఉదహారణగా నిలచింది. ఇది పల్లాడియంతో నడిచే ఆర్క్‌ రియాక్టర్‌ మార్వెల్‌తో పనిచేస్తుంది. ఇది విఫలమైన మానవ గుండె పనితీరును పూర్తిగా భర్తీ చేయడానికి రూపొందించిన టైటానియం బ్లడ్-పంపర్. దీన్ని బైవేకర్‌ అనే వైద్య సంస్థ అభివృద్ధి చేసంది. ఇది టోటల్‌ ఆర్టిఫిషియల్‌ హార్ట్‌(టీఏహెచ్‌) అని అంటారు. ఇది అచ్చం మానవ గుండె మాదిరిగా డిజైన్‌ చేశారు. అయితే సహజ హృదయస్పందనను అనుకరించదు. బదులుగా ఊపిరితిత్తులకు, శరీరంలోని మిగిలిన భాగాలకు రక్తాన్ని పంప్‌ చేయడానికి అయస్కాంతంగా లెవిటేటింగ్ రోటర్‌ను ఉపయోగిస్తుంది. ఈ వినూత్న డిజైన్ సౌకర్యవంతమైన గదులు లేదా పంపింగ్ డయాఫ్రాగమ్‌ల అవసరాన్ని తొలగిస్తుంది. చెప్పాలంటే ఇది మన్నికైన మరియు కాంపాక్ట్ పరికరంగా పేర్కొనవచ్చు.ఈ కృత్రిమ హార్ట్‌ ఇంప్లాంటేషన్‌ టెక్సాస్‌ హార్ట్‌ ఇన్‌స్టిట్యూట్‌లోని బేలర్ సెయింట్ లూక్స్ మెడికల్ సెంటర్‌లో జరిగింది. ఈ మేరకు సదరు వైద్యులు మాట్లాడుతూ.."బాధితుడికి దాత అందుబాటులోకి వచ్చేవరకు ఈ కృత్రిమ గుండె ఎనిమిది రోజుల పాటు సమర్థవంతంగా పనిచేసింది. అంతేగాదు ఎన్నోఏళ్లుగా ఈ విషయమై సాగుతున్న పరిశోధనకు ఈ ఇంప్లాంటేషన్‌ సర్జరీ ముగింపు పలికింది. సదరు రోగి కుటుంబ సహకారం వల్ల ఇదంతా సాధ్యమయ్యింది.దీని కాంపాక్ట్ సైజు, ఇంచుమించు పిడికిలిలా ఉంటుంది. ఇది పురుషులు, స్త్రీలతో సహా అనేక రకాల రోగులకు అనుకూలంగా ఉంటుంది. ఏటా గుండె మార్పిడి డిమాండ్‌ అధికంగా ఉంది. దాతలు అందుబాటులో లేకపోవడంతో వేలాదిమంది ప్రాణాలు కోల్పోతున్నారు. ఆ సమస్యకు ఈ కృత్రిమ గుండె చెక్‌పెట్టి..ఆయా బాధితుల జీవన నాణ్యతను మెరుగుపరచడంలో కీలక పాత్ర పోషస్తుంది. అంతేగాదు ఇది తీవ్రమైన గుండె వైఫల్య చికిత్సలో కొత్త శకానికి మార్గం సుగమం చేస్తుంది." అని అన్నారు. (చదవండి: గంజాయితో లాభాలు! పరిశోధనలో షాకింగ్‌ విషయాలు..!)

ఈశాన్య ఆఫ్రికాలోని సూడాన్‌లో కుండపోత వర్షాలు కురుస్తున్నాయి. ఈ కారణంగా పలుచోట్ల వరదల సంభవిస్తున్నాయి. ఈ పరిస్థితుల నేపధ్యంలో 32 మంది మృతిచెందారని, 107 మంది గాయపడ్డారని సూడాన్ ఆరోగ్య మంత్రిత్వ శాఖ మీడియాకు తెలిపింది.దేశంలో కురుస్తున్న వర్షాలు, ముంచెత్తుతున్న వరదలు ఏడు రాష్ట్రాలను ప్రభావితం చేశాయి. 5,575 ఇళ్ళు దెబ్బతిన్నాయని ప్రభుత్వం ఒక ప్రకటనలో పేర్కొంది. జిన్హువా వార్తా సంస్థ తెలిపిన వివరాల ప్రకారం భారీ వర్షాలు, వరదల కారణంగా డయేరియా కేసులు విపరీతంగా నమోదవుతున్నాయి. ఇదిలావుండగా కస్సాలా నగరం గుండా ప్రవహించే గాష్ నది నీటి మట్టం పెరుగుతోంది.దీంతో పౌరులు అప్రమత్తంగా ఉండాలని, నదీ తీరాలకు దూరంగా ఉండాలని అధికారులు సూచించారు. సూడాన్‌లో సాధారణంగా జూన్, అక్టోబర్ మధ్య వరదలు సంభవిస్తుంటాయి. గత మూడేళ్లుగా కురుస్తున్న భారీ వర్షాలకు వందలాది మంది మృతి చెందగా, లెక్కలేనన్ని వ్యవసాయ భూములు ధ్వంసమయ్యాయి.

ముంబై: మహారాష్ట్రలోని సింధుదుర్గ్ జిల్లాలో అమెరికాకు చెందిన ఓ మహిళను గొలుసులతో కట్టేసిన ఘటనలో ట్విస్ట్‌ చోటు చేసుకుంది. పోలీసుల వాంగ్మూలంలో అమెరికన్ మహిళ తనకు తాను సంకెళ్లు వేసుకున్నానని, మరెవరి ప్రమేయం లేదని పోలీసులకు వాంగ్మూలం ఇచ్చింది. జులై 27 న సింధుదుర్గ్‌ జిల్లాలోని అటవీ ప్రాంతమైన సోనుర్లి గ్రామ శివార్లలో ఇనుప గొలుసులతో మహిళను చెట్టుకు కట్టేశారు. అయితే ఆ ప్రాంతానికి వెళ్లిన పశువు కాపరికి మహిళ బిగ్గరగా కేకలు వేస్తూ కనిపించారు. దీంతో పశువుల కాపరి అందించిన సమాచారంతో పోలీసులు ఘటనా స్థలానికి చేరుకున్నారు. కట్టేసిన గొలుసుల్ని విడిపించారు. అత్యవసర చికిత్స కోసం ఆస్పత్రికి తరలించారు. వైద్య పరీక్షల అనంతరం ఆమె పలు మానసిక సమస్యలతో బాధపడుతున్నట్లు వైద్యులు నిర్ధారించారు. శనివారం (ఆగస్టు 3) సింధుదుర్గ్ పోలీసులు మహిళ వాంగ్మూలాన్ని నమోదు చేశారు. ఈ సమయంలో ఆమె మూడు తాళాలు, ఇనుప గొలుసులతో ముంబై నుంచి 460 కిలోమీటర్ల దూరంలోని సోనుర్లి గ్రామ సమీపంలోని అడవిలోకి వెళ్లినట్లు, తాను అక్కడనున్న ఓ చెట్టుకు కట్టుకున్నట్లు తెలిపారు. ఆమెను ఎన్ని రోజులు చెట్టుకు కట్టివేసిందనే దానిపై ఇంకా స్పష్టత లేదని ఆయన చెప్పారు.ఇక మహిళ వద్ద ఉన్న బ్యాగ్‌ను పరిశీలించగా.. ఆమె బ్యాగ్‌లో అమెరికా పాస్‌పోర్ట్‌, ఆధార్‌ కార్డ్‌, ఇతర డాక్యుమెంట్లు ఉన్నాయి. ఆమెను తమిళనాడుకు చెందిన లలితా కయీగా గుర్తించిన పోలీసులు..తమిళనాడు పోలీసులకు సమాచారం అందించారు. తదిపరి విచారణ కొనసాగుతోంది.