టీ20 వ‌రల్డ్‌క‌ప్ ఛాంపియ‌న్, టీమిండియా స్టార్ పేస‌ర్ మ‌హ్మ‌ద్ సిరాజ్ త‌న సొంత గ‌డ్డ‌పై అడుగు పెట్టాడు. ఢిల్లీలో టీమిండియా విక్ట‌రీ బ‌స్ ప‌రేడ్ ముగించుకుని హైద‌రాబాద్‌కు చేరుకున్న సిరాజ్‌కు అభిమాన‌లు ఘ‌న‌స్వాగతం ప‌లికారు.ఎయిర్ పోర్ట్ వ‌ద్ద‌కు భారీగా చేరుకున్న ఫ్యాన్స్ అత‌డికి జేజేలు ప‌లికారు. సిరాజ్ మియాతో ఫోటోలు దిగ‌డానికి అభిమానులు ఎగ‌బ‌డ్డారు. అనంతరం మహ్మద్ సిరాజ్ రోడ్ షోలో పాల్గొన్నాడు. మెహిదీప‌ట్నం నుంచి ఈద్‌గ‌హ్ గ్రౌండ్‌లోని సిరాజ్ ఇంటి వ‌ర‌కు భారీగా ర్యాలీగా వెళ్లాడు. ఇందుకు సంబంధించిన ఫోటోలు, వీడియోలు ప్ర‌స్తుతం సోష‌ల్ మీడియాలో వైర‌ల‌వుతున్నాయి. కాగా సిరాజ్‌కు సన్‌రైజ‌ర్స్ హైద‌రాబాద్ ఫ్రాంచైజీ కూడా ఆపూర్వ స్వాగ‌తం ప‌లికింది. హైదరాబాద్.. వ‌ర‌ల్డ్‌క‌ప్‌ హీరో మహమ్మద్ సిరాజ్ స్వాగ‌తం ప‌ల‌కుతుంద‌ని ఎస్ఆర్‌హెచ్ ఎక్స్‌లో రాసుకొచ్చింది. కాగా టీ20 వరల్డ్‌కప్‌ విజేతగా భారత్‌ నిలవడంలో సిరాజ్‌ తన వంతు పాత్ర పోషించాడు. అమెరికా వేదికగా జరిగిన లీగ్‌ స్టేజి మ్యాచ్‌ల్లో సిరాజ్‌ కట్టుదిట్టంగా బౌలింగ్‌ చేశాడు. ఆ తర్వాత కుల్దీప్‌ యాదవ్‌ రాకతో మిగిలిన మ్యాచ్‌లకు సిరాజ్‌ బెంచ్‌కే పరిమితమయ్యాడు. #WATCH | Cricket fans welcome Mohammed Siraj on his return to Hyderabad after winning the T20I Cricket World Cup pic.twitter.com/aEzskY51vG— ANI (@ANI) July 5, 2024

భార‌త్‌-జింబాబ్వే మ‌ధ్య ఐదు మ్యాచ్‌ల టీ20ల సిరీస్‌ల‌కు స‌ర్వం సిద్ద‌మైంది. జూలై 5న‌ హ‌రారే వేదిక‌గా ఇరు జ‌ట్ల మ‌ధ్య జ‌ర‌గ‌నున్న తొలి టీ20తో ఈ సిరీస్ ప్రారంభం కానుంది. ఈ సిరీస్‌లో ఆతిథ్య జింబాబ్వే పూర్తిస్ధాయి జ‌ట్టుతో బ‌రిలోకి దిగుతుండ‌గా.. భార‌త్ మాత్రం పూర్తిగా యువ జ‌ట్టుతో ఆడ‌నుంది. ఈ ప‌ర్య‌ట‌నకు టీ20 వ‌ర‌ల్డ్‌క‌ప్-2024లో భాగమైన భార‌త ఆట‌గాళ్లకు బీసీసీఐ సెల‌క్ష‌న్ క‌మిటీ విశ్రాంతి ఇచ్చింది. దీంతో ఓపెన‌ర్ శుబ్‌మ‌న్‌గిల్‌కు జ‌ట్టు సార‌థ్య బాధ్య‌త‌లు అప్ప‌గించారు. అదే విధంగా ఐపీఎల్‌-2024లో అద్భుత ప్ర‌ద‌ర్శ‌న క‌న‌బ‌రిచిన అభిషేక్ శ‌ర్మ‌, రియాన్ ప‌రాగ్‌, తుషార్ దేశ్‌పాండే, హ‌ర్షిత్ రానాల‌కు భార‌త సెల‌క్ట‌ర్లు తొలిసారి పిలుపునిచ్చారు.అభిషేక్ అరంగేట్రం..ఇక తొలిసారి భార‌త జ‌ట్టు ఎంపికైన అభిషేక్ శ‌ర్మ.. శ‌నివారం జింబాబ్వేతో జ‌ర‌గ‌నున్న తొలి టీ20తో అంత‌ర్జాతీయ అరంగేట్రం చేయ‌నున్నాడు. ఈ విష‌యాన్ని భార‌త కెప్టెన్ శుబ్‌మ‌న్ గిల్ ధ్రువీక‌రించాడు. ఈ మ్యాచ్‌కు మీడియాతో మాట్లాడిన గిల్‌.. త‌నతో క‌లిసి అభిషేక్ శ‌ర్మ ఇన్నింగ్స్‌ను ప్రారంభించ‌నున్నాడ‌ని చెప్పుకొచ్చాడు. అదే విధంగా ఫ‌స్ట్ డౌన్‌లో రుతురాజ్ గైక్వాడ్ బ్యాటింగ్‌కు రానున్నాడ‌ని గిల్ తెలిపాడు. కాగా ఐపీఎల్‌-2024లో ఎస్ఆర్‌హెచ్‌కు ప్రాత‌నిథ్యం వ‌హించిన‌ అభిషేక్ శ‌ర్మ సంచ‌ల‌న ప్ర‌ద‌ర్శ‌న క‌నబ‌రిచాడు. అభిషేక్ ఓపెన‌ర్‌గా ట్రావిస్ హెడ్‌తో క‌లిసి భీబ‌త్సం సృష్టించాడు. ఐపీఎల్ చరిత్రలోనే సన్‌రైజర్స్ భారీ స్కోర్ చేయడంలో అభిషేక్‌ది కీలక పాత్ర. ఈ ఏడాది ఐపీఎల్ సీజ‌న్‌లో 16 మ్యాచ్‌లు ఆడిన అభిషేక్‌ 32.27 స‌గ‌టుతో 484 పరుగులు చేశాడు. టీమిండియా దిగ్గజం యువరాజ్ సింగ్ గైడెన్స్‌లో రాటుదేలుతున్న అభిషేక్ శర్మ.. దేశీవాళీ క్రికెట్‌లో సైతం అదరగొడుతున్నాడు.

చెపాక్ స్టేడియం వేదిక‌గా భార‌త మ‌హిళ‌ల‌తో జ‌రుగుతున్న తొలి టీ20లో దక్షిణాఫ్రికా బ్యాటర్లు అదరగొట్టారు. టాస్‌ ఓడి తొలుత బ్యాటింగ్‌ చేసిన సౌతాఫ్రికా నిర్ణీత 20 ఓవర్లలో 4 వికెట్ల నష్టానికి 189 పరుగులు చేసింది. సౌతాఫ్రికా బ్యాటర్లలో ఓపెనర్‌ తజ్మిన్ బ్రిట్స్ ఆకాశమే హద్దుగా చెలరేగింది. మొదట ఆచితూచి ఆడిన బ్రిట్స్‌.. మిడిల్‌ ఓవర్లలో తన విశ్వరూపం చూపించింది. 56 బంతులు ఎదుర్కొన్న బ్రిట్స్‌ 10 ఫోర్లు, 3 సిక్స్‌లతో 81 పరుగులు చేసింది.ఆమెతో పాటు మారిజన్నే కాప్‌(57) హాఫ్‌ సెంచరీతో మెరిసింది. ఇక భారత బౌలర్లలో పుజావస్త్రాకర్‌, రాధా యాదవ్‌ తలా రెండు వికెట్లు సాధించారు. మిగితా భారత బౌలర్లంతా విఫలమయ్యారు. కాగా ఇంతకముందు జరిగిన వన్డే, టెస్టు సిరీస్‌లను భారత్‌ సొంతం చేసుకున్న సంగతి తెలిసిందే.

టీ20 వ‌ర‌ల్డ్‌క‌ప్-2024 విజేత‌గా నిలిచి 13 ఏళ్ల నిరీక్ష‌ణ‌కు తెర‌దించిన భార‌త జ‌ట్టుకు మ‌రో జాక్ పాట్ త‌గిలింది. విశ్వ‌విజేత టీమిండియాకు మహారాష్ట్ర ముఖ్యమంత్రి ఏక్‌నాథ్ షిండే రూ.11 కోట్ల నగదు బహుమతిని ప్రకటించారు.భార‌త విన్నింగ్ టీమ్‌లో స‌భ్యులైన కెప్టెన్ రోహిత్ శ‌ర్మ‌, సూర్యకుమార్ యాదవ్, యశస్వి జైస్వాల్, శివ‌మ్ దూబేలు ముంబై చెందిన క్రికెట‌ర్లన్న సంగతి తెలిసిందే.ఈ క్రమంలో ఈ నలుగురిని శుక్రవారం విధాన్ భవన్ (స్టేట్ లెజిస్లేచర్ కాంప్లెక్స్) సెంట్రల్ హాల్‌లో సీఎం ఏక్‌నాథ్ షిండే స‌న్మానించారు. ఈ కార్యక్రమంలో వారితో పాటు భారత బౌలింగ్‌ కోచ్‌ పరాస్ మాంబ్రే కూడా పాల్గోనున్నారు. ఈ సంద‌ర్భంగానే న‌గ‌దు బ‌హుమ‌తిని ఏక్‌నాథ్ షిండే ప్ర‌క‌టించారు. అదేవిధంగా దక్షిణాఫ్రికాతో ఫైనల్‌ మ్యాచ్‌లో అద్బుత క్యాచ్‌ను అందుకున్న సూర్యకుమార్‌ యాదవ్‌ను షిండే ప్రత్యేకంగా అభినందించారు. కాగా జ‌గ‌జ్జేత‌ నిలిచిన భారత జట్టుకు బీసీసీఐ సైతం రూ. 120 కోట్ల భారీ ప్రైజ్‌మనీ అందించింది.

టీమిండియా స్టార్ క్రికెట‌ర్లు విరాట్ కోహ్లి, రోహిత్ శ‌ర్మ‌లు త‌మ‌ అంత‌ర్జాతీయ టీ20 కెరీర్‌కు ఘ‌నంగా విడ్కోలు ప‌లికారు. గ‌త 13 ఏళ్ల‌గా ఊరిస్తున్న వ‌ర‌ల్డ్‌క‌ప్‌ను భార‌త్‌కు అందించి వారు త‌మ టీ20 ప్ర‌య‌ణాన్ని ముగించారు. టీ20 వ‌ర‌ల్డ్‌క‌ప్-2024 విజ‌యం త‌ర్వాత ఈ దిగ్గ‌జ క్రికెట‌ర్లు పొట్టి క్రికెట్‌కు రిటైర్మెంట్ ప్ర‌క‌టించారు. అనంత‌రం ట్రోఫీతో భార‌త గడ్డ‌పై అడుగుపెట్టిన ఈ లెజెండ‌రీ క్రికెట‌ర్లకు అభిమానుల నుంచి ఘ‌న స్వాగతం ల‌భించింది. ఈ నేప‌థ్యంలో భారత మాజీ క్రికెట‌ర్ సురేష్ రైనా బీసీసీఐకి ఓ విజ్ఞప్తి చేసాడు. భార‌త దిగ్గ‌జ క్రికెట‌ర్లు స‌చిన్ టెండూల్క‌ర్‌, ఎంస్ ధోని మాదిరిగానే విరాట్ కోహ్లి, రోహిత్ శ‌ర్మ‌ల జెర్సీల‌ను సైతం రిటైర్ చేయాలని రైనా బీసీసీఐని కోరాడు. కాగా విరాట్ కోహ్లి జెర్సీ నెం. 18 కాగా.. రోహిత్ జెర్సీ నంబ‌ర్ 45."బీసీసీఐకి ఓ విజ్ఞప్తి చేయాల‌న‌కుంటున్నాను. వ‌ర‌ల్డ్‌క‌ప్‌ను అందించిన విరాట్ కోహ్లి, రోహిత్ శ‌ర్మ‌ల‌కు ప్ర‌త్యేక గౌర‌వం ద‌క్కాలి. కాబ‌ట్టి జెర్సీ నెం.18 నెం. 45ని రిటైర్ చేయమ‌ని భార‌త క్రికెట్ బోర్డును అభ్యర్థిస్తున్నాను. ఈ రెండు జెర్సీల‌ను బీసీసీఐ తమ కార్యాలయంలో గౌర‌వంగా ఉంచుకోవాలి. ఇప్ప‌టికే జెర్సీ నెం 10(స‌చిన్‌), నెం 7(ధోని)ల‌కు బీసీసీఐ అపెక్స్ కౌన్సిల్ రిటైర్మెంట్ ఇచ్చింది. ఆవిధంగానే ఇప్పుడు విరాట్‌, రోహిత్ జెర్సీ నెంల‌ను ఎవ‌రికీ కేటాయించకూడదు. ఆ జెర్సీ నంబ‌ర్‌లను చూస్తే ప్ర‌తీ ఒక్క‌రికి స్పూర్తి క‌ల‌గాలి. నెం.18, నెం. 45ల జెర్సీ ధ‌రించిన ఆ ఇద్ద‌రు ఆట‌గాళ్లు భార‌త్‌కు ఎన్నో చారిత్ర‌త్మ‌క విజ‌యాల‌ను అందించారు. ఏ ఆటగాడు జట్టులోకి వచ్చినా ఈ జెర్సీ నంబర్ల‌ను ఆద‌ర్శంగా తీసుకోవాల‌ని" జియో సినిమాకు ఇచ్చిన ఇంట‌ర్వ్యూలో రైనా పేర్కొన్నాడు.