-
అమెరికాలో ‘చిత్రాంగద’
‘గీతాంజలి’గా అలరించిన అంజలి, ఈసారి ‘చిత్రాంగద’గా రానున్నారు. ఈ థ్రిల్లర్, కామెడీ మూవీని అశోక్ దర్శకత్వంలో గంగపట్నం శ్రీధర్ నిర్మిస్తున్నారు. అమెరికాలో ఎక్కువ శాతం చిత్రీకరణ జరిపారు. యూరప్, కేరళల్లో చిత్రీకరించే పాటలతో సినిమా పూర్తవుతుందనీ, వేసవిలో చిత్రాన్ని విడుదల చేస్తామని నిర్మాత తెలిపారు. -
ఆ వీడియో వివాదం ముగిసింది!
న్యూయార్క్ : ప్రపంచంలో తిరుగు లేని రారాజుగా ఓ వెలుగు వెలిగిన మైఖేల్ జాక్సన్ తిరిగి రాని లోకాలకు వెళ్లిపోయినా ఎప్పటికీ ఆయన చిరంజీవే. ఎంతో మంది వీరాభిమానులను సంపాదించుకున్న మైఖేల్ జాక్సన్ నటించిన 'థ్రిల్లర్' వీడియోను మరోసారి ప్రేక్షకుల ముందుకు తీసుకురాబోతున్నారు. గతంలో థ్రిల్లర్ వీడియోకు సంబంధించి చోటు చేసుకున్న వివాదం ముగిసిపోవడంతో తిరిగి తెరపై తీసుకురావడానికి సన్నాహాలు ఆరంభించారు. అయితే ఈ వీడియోను త్రీడీ రూపంలో అభిమానుల ముందుకు తీసుకువస్తున్నట్లు చిత్ర దర్శకుడు జాన్ లాండిస్ తెలిపాడు. ' నిర్మాతలు ఎంతో ప్రతిష్టాత్మకంగా నిర్మించిన ఈ 14 నిమిషాల అల్బమ్ కు జాక్సన్ న్యాయం చేశాడు. ఈ ఆల్బమ్ లో సాంగ్స్ సూపర్ హిట్ కావడమే మరోసారి త్రీడిలో తీసుకురావడానికి కారణం. దీనిపై గతంలో చోటు చేసుకున్న దావా వివాదం సమసి పోయింది. ఆ వీడియోపై న్యాయ పరమైన సమస్యలు తలెత్తడంతో ఆ వివాదం చాలా సంవత్సరాల పాటు నడిచింది. ప్రస్తుతం ఆ వివాదాన్ని సెటిల్ చేసుకున్నాం. 2015 లో ఈ వీడియో ప్రేక్షకుల ముందుకు రానుంది' అని లాండిస్ తెలిపాడు. ఈ వీడియోను జాక్సన్ అభిమానులు తిరిగి అత్యంత అధునాతనంగా బిగ్ స్ర్కీన్లపై తిలకించే అవకాశం దక్కుతున్నందుకు తనకు ఆనందంగా ఉందన్నాడు. -
మూడు భాషల్లో థ్రిల్లర్..!
‘ఇంగ్లిష్ వింగ్లిష్’ ద్వారా వైభవంగా సెకండ్ ఇన్నింగ్స్ ప్రారంభించిన శ్రీదేవి వెంటనే మరో సినిమాకి గ్రీన్ సిగ్నల్ ఇవ్వకుండా కొంత గ్యాప్ తీసుకున్నారు. మళ్లీ చేస్తే, ‘ఇంగ్లిష్ వింగ్లిష్’ అంత విజయవంతమైన సినిమానే చేయాలనే పట్టుదలతో ఉన్నారామె. అందుకే, కథల ఎంపిక విషయంలో చాలా జాగ్రత్త వహిస్తున్నారు. ఇటీవల శ్రీదేవి, ఆమె భర్త బోనీకపూర్ ఓ కథ విన్నారు. తల్లి, ఇద్దరు పిల్లల చుట్టూ సాగే కథ ఇది. పగ, ప్రతీకారాల నేపథ్యంలో సాగే థ్రిల్లర్. ఈ కథ ఏ భాషకైనా బాగుంటుందని, హిందీతో పాటు తెలుగు, తమిళ భాషల్లో ఏకకాలంలో నిర్మిస్తే బాగుంటుందన్నది ఈ దంపతుల అభిప్రాయం. ఈ మూడు భాషల్లోనూ సమర్థవంతంగా తెరకెక్కించగల దర్శకుణ్ణి ఎంపిక చేయాలనుకుంటున్నారట. మరి.. ఈ భారీ ఆఫర్ ఏ దర్శకుడికి దక్కుతుందో?