Select Your Preferred Category to see your Personalized Content

సాక్షి, హైదరాబాద్‌/నల్లగొండ: తన ఇళ్లు, కార్యాలయాల్లో ఐటీ దాడులు జరుగుతున్నాయనే వార్తలను మిర్యాలగూడ బీఆర్ఎస్ అభ్యర్థి నల్లమోతు భాస్కర్ రావు ఖండించారు.  ఆ వార్తల్లో ఎటువంటి వాస్తవం లేదని, ఆ ప్రచారాన్ని నమ్మవద్దని విజ్ఞప్తి చేశారు.  ఎక్కడో వ్యాపారస్తుల మీద రైడ్‌ జరిగితే తనకేంటి సంబంధమని ప్రశ్నించారు.  నా బంధువులపై, నా కుమారుల ఇంట్లో సోదాలు జరగట్లేదు.నాపైన ఐటీ సోదాలు జరిగితే నేనెందుకు ఎన్నికల ప్రచారం నిర్వహిస్తాను. నాకు పవర్ ప్లాంట్స్‌ ఉన్నాయి  ఐటీ దాడులు అన్నది వదంతి మాత్రమే .నాపైన ఐటీ సోదాలు జరుగుతున్నాయన్న ప్రచారాన్ని నమ్మకండి. నేను ఎన్నికల ప్రచారంలో బిజీగా ఉన్నాను’ అని తెలిపారు.

సాక్షి, హైదరాబాద్‌/నల్లగొండ: తెలంగాణలో అసెంబ్లీ ఎన్నికల వేళ ఐడీ దాడులు రాజకీయంగా తీవ్ర కలకలం సృష్టిస్తున్నాయి. తాజాగా బీఆర్‌ఎస్‌ అభ్యర్థి నల్లమోతు భాస్కర్‌ రావు ఇంట్లో, ఆయన బంధువుల నివాసాల్లో ఐటీ అధికారులు తనిఖీలు చేపట్టారు. ఏక కాలంలో 40 బృందాలు దాడులు చేస్తున్నాయి. దీంతో, పొలిటికల్‌గా ప్రాధాన్యత సంతరించుకుంది.  వివరాల ప్రకారం.. మిర్యాలగూడ బీఆర్ఎస్ అభ్యర్థి నల్లమోతు భాస్కర్ రావు ఇళ్లు, కార్యాలయాల్లో ఐటీ అధికారులు తనిఖీలు చేపట్టారు. గురువారం తెల్లవారుజాము నుంచే ఐటీ సోదాలు జరుగుతున్నాయి. మిర్యాలగూడతో పాటు నల్గొండ, హైదారాబాద్‌లోని ఆయన నివాసాల్లో ఏక కాలంలో ఐటీ అధికారులు సోదాలు నిర్వహిన్నారు. మొత్తం 40 బృందాలు ఈ దాడుల్లో పాల్గొన్నాయి. నల్లమోతు భాస్కర్ రావుకు దేశ వ్యాప్తంగా పలు వ్యాపారాలు ఉన్నాయి. పవర్ ప్రాజెక్టుల్లో ఆయన పెట్టుబడులు పెట్టినట్లు తెలిసింది. అయితే ఎన్నికల్లో ఖర్చు చేసేందుకు భారీగా డబ్బు నిల్వచేసినట్లు ఆరోపణలు ఉన్నాయి. ఈ మేరకు సమాచారం అందుకున్న ఐటీ అధికారులు ఆయన ఇళ్లు, కార్యాలయాలపై దాడులు చేశారు. బంధువుల ఇళ్లలో సోదాలు.. మరోవైపు.. ఆయన బంధువుల ఇళ్లలో కూడా ఐటీ అధికారులు సోదాలు నిర్వహిస్తున్నారు. భాస్కర రావు బావమరిది రంగా శ్రీధర్‌తో పాటు మరొక నాలుగు చోట్ల మిర్యాలగూడలో సోదాలు జరుగుతున్నాయి. భాస్కర రావు ప్రధాన అనుచరులు, రైస్‌ మిల్‌ అసోసియేషన్‌ నేతల ఇళల్లో సోదాలు కొనసాగుతున్నాయి. విజయం శ్రీధర్‌, కుశలయ్య ఇళ్లలో కూడా అధికారులు తనిఖీలు చేస్తున్నారు.  ఇదిలా ఉండగా.. ఇటీవలే తెలంగాణలో ఎన్నికల సందర్బంగా ఐటీ అధికారులు దాడులు చేస్తున్న విషయం తెలిసిందే. మంత్రి సబితా ఇంద్రారెడ్డి అనుచరుల ఇళ్లపై కూడా ఇటీవల ఐటీ అధికారులు దాడులు చేశారు. ఈ సోదాల్లో సబితా అనుచరులుగా ప్రచారం జరుగుతున్న నరేందర్ రెడ్డి ఇంట్లో 7.50 కోట్లు, ప్రదీప్ రెడ్డి ఇంట్లో రూ.5 కోట్లకు పైగా డబ్బును ఐటీ అధికారులు సీజ్ చేశారు. ఈ నగదును మహేశ్వరం ఎన్నికల కోసం సమకూర్చుకున్నదిగా ప్రచారం జరుగుతోంది. ప్రదీప్ రెడ్డి, నరేందర్ రెడ్డికి మంత్రి సబితా కుమారుడితో సన్నిహిత సంబంధాలు ఉన్నట్లుగా ఐటీ అధికారులు విచారణలో గుర్తించారు. అటు, పొంగులేటి ఇంట్లో కూడా ఐటీ దాడులు జరిగాయి. 

మిర్యాలగూడ నియోజకవర్గం మిర్యాలగూడ నియోజకవర్గంలో సిటింగ్‌ ఎమ్మెల్యే నల్లమోతు భాస్కరరావు మరోసారిగెలిచారు. ఆయన 2014లో  కాంగ్రెస్‌ ఐ టిక్కెట్‌పై విజయం సాదించి, తదుపరి పరిణామాలలో టిఆర్‌ఎస్‌ లో చేరిపోయారు.2018లో టిఆర్‌ఎస్‌ పార్టీ పక్షాన పోటీచేసి 30652 ఓట్ల మెజార్టీతో గెలుపొందారు. భాస్కరరావు తన సమీప ప్రత్యర్ది, కాంగ్రెస్‌ ఐ పక్షాన పోటీచేసిన బిసి సంఘం నేత ఆర్‌.కృష్ణయ్యను ఓడిరచారు. 2014లో  కృష్ణయ్య ఎల్బినగర్‌ నుంచి టిడిపి టిక్కెట్‌పై గెలుపొందారు. కానీ ఈ ఎన్నికల ముందు ఆయన అనూహ్యంగా కాంగ్రెస్‌ ఐలో చేరి మిర్యాలగూడ టిక్కెట్‌ పొంది పోటీచేసినా పలితం దక్కలేదు. భాస్కరరావుకు 83931 ఓట్లు రాగా, ఆర్‌.కృష్ణయ్యకు 53279 ఓట్లు వచ్చాయి. ఇక్కడ ఇండిపెండెంట్‌ అభ్యర్దిగా పోటీచేసిన స్కైలాబ్‌ నాయక్‌కు దాదాపు పద్నాలుగు వేల ఓట్లు వచ్చాయి. నల్లమోతు భాస్కరరావు కమ్మ సామాజికవర్గం నేత. సిపిఎం సీనియర్‌ నేత  జూలకంటి రంగారెడ్డి మిర్యాలగూడలో మూడుసార్లు గెలిచారు. మిర్యాలగూడలో కాంగ్రెస్‌, కాంగ్రెస్‌ఐ కలిసి ఏడుసార్లు, సిపిఎం ఐదుసార్లు గెలవగా, ఒకసారి పిడిఎఫ్‌, ఒకసారి టిఆర్‌ఎస్‌ గెలిచాయి. మరో నేత తిప్పన చినకృష్ణారెడ్డి ఇక్కడ నుండి మూడుసార్లు గెలిస్తే, ప్రముఖ కాంగ్రెస్‌ నేత  చకిలం శ్రీనివాసరావు ఇక్కడ ఒకసారి, నల్గొండ నుంచి రెండుసార్లు విజయం సాధించారు. చకిలం ఒకసారి లోక్‌సభకు కూడా ఎన్నికయ్యారు. చినకృష్ణారెడ్డి, 1989లో గెలిచిన విజయసింహారెడ్డి తండ్రి, కుమారులు 2004లో ఇక్కడ టిడిపి పక్షాన  పోటీచేసిన మాజీ పోలీసు అధికారి పి. చంద్రశేఖరరెడ్డి, ఆ తర్వాత టిఆర్‌ఎస్‌లో చేరారు. 2009లో సూర్యాపేట నుంచి పోటీ చేసి ఓడిపోయారు. తెలుగుదేశం పార్టీ ఇక్కడ నుంచి ఒక్కసారి కూడా గెలుపొందలేదు. అయితే టిడిపి మిత్రపక్షంగా సిపిఎం గెలుపొందింది. మిర్యాలగూడలో ఎనిమిదిసార్లు రెడ్డి సామాజికవర్గం, నాలుగుసార్లు కమ్మ, వైశ్య, బ్రాహ్మణ,  ఒక్కొక్కసారి గెలిచారు. మిర్యాలగూడ నియోజకవర్గంలో గెలిచిన‌.. ఓడిన అభ్య‌ర్థులు వీరే..

ఎప్పుడూ మంత్రి కాలేదు. కాని మంత్రి కంటే ఎక్కువగానే అధికారాలు అనుభవించారు. ప్రత్యేక రాష్ట్రం రాగానే రాజకీయ గురువుకు సున్నం పెట్టాడు. గెలిపించిన పార్టీకి పంగనామాలు పెట్టి అధికార పార్టీలో చేరిపోయాడు. మూడోసారి పోటీ చేయడానికి రెడీ అవుతున్న ఆ నేత ఇటీవల పదే పదే జనానికి సారీ చెబుతున్నాడు. అనవసరపు చిక్కులు కొని తెచ్చుకుంటున్నాడు. సీనియర్ ఎమ్మెల్యేకు సారీ చెప్పాల్సిన అవసరం ఎందుకొచ్చింది? ఇంతకీ ఆ నేత ఎవరు?  కాంగ్రెస్‌కు చేయిచ్చి.. ఆ వెంటనే కారెక్కి.! ఎంతటి నాయకులైనా నోరు జారితే తిరిగి వెనక్కు తీసుకోలేరు. ఒక ఎమ్మెల్యే స్థాయి నేత పబ్లిక్‌లో ఇష్టారీతిన కామెంట్స్‌ చేస్తే అటు ఆయనకు.. ఇటు పార్టీకి కూడా నష్టం తప్పదు. నల్గొండ జిల్లా మిర్యాలగూడ ఎమ్మెల్యే నల్లమోతు భాస్కరరావుకు ఇప్పుడదే జరిగింది. గతంలో రెండు దశాబ్ధాల పాటు కాంగ్రెస్ సీనియర్ నేత కుందూరు జానారెడ్డికి షాడోగా వ్యవహరించిన వ్యక్తి. ఆయన అండదండలతో.. 2014లో రాజకీయాల్లోకి వచ్చీరాగానే.. మిర్యాలగూడ నుంచి కాంగ్రెస్ టికెట్ పొందారు. ఎమ్మెల్యే కాగానే గురువును వదిలేసి గులాబీ పార్టీలో చేరిపోయారు భాస్కరరావు. 2018లో బీఆర్ఎస్ నుంచి టికెట్ తెచ్చుకుని మరోసారి పోటీ చేసి గెలిచారు. ఇంత వరకు బాగానే ఉంది. కానీ ఈ మధ్య ఎమ్మెల్యే భాస్కరరావు చేస్తున్న వ్యాఖ్యలు ఆయనతో పాటు గులాబీ పార్టీని కూడా ఇబ్బందులకు గురిచేసేలా ఉన్నాయనే కామెంట్స్‌ వినిపిస్తున్నాయి.  రోడ్లతో రాజకీయమా? ఆ మధ్య అడవిదేవులపల్లి మండలం నర్సాపూర్ గ్రామంలో..సీసీ రోడ్ల ప్రారంభోత్సం సందర్భంగా ఆయన మాట్లాడిన మాటలు రాజకీయంగా దుమారం రేపాయి. మేము వేయించిన రోడ్లపై నడవద్దు, మేము ఇచ్చే సంక్షేమ పథకాలు తీసుకోవద్దని.. తాను తలుచుకుంటే ఐదు నిమిషాల్లో డ్యాన్సులు చేయిస్తానంటూ ప్రతిపక్షాలే లక్ష్యంగా ఆయన మాట్లాడిన మాటలు ఆయనకు..పార్టీకీ డ్యామేజ్‌ చేసేవిగా మారాయి. జరిగిన నష్టం గమనించిన ఆయన తన వ్యాఖ్యలకు సంజాయిషీ ఇచ్చుకోవాల్సి వచ్చింది. ఆ ఘటన మరిచిపోకముందే మరో కార్యక్రమంలోనూ ఇదేరకంగా నోటి దురుసును ప్రదర్శించారాయన.  మిర్యాలగూడలో జరిగిన దళిత బంధు యూనిట్ల పంపిణీ కార్యక్రమం సందర్బంగా ఎంపీపీ సరళపై ఆగ్రహం వ్యక్తం చేశారు. అంతేకాకుండా రెండు కులాల పేర్లను ప్రస్తావిస్తూ... ఆ వర్గాలు చేసే పనులు కూడా నేనే చేయాలా అంటూ తీవ్ర స్వరంతో మాట్లాడారు. ఈ వీడియోలు బయటకు రావడం, వైరల్‌ కావడంతో మరోసారి మిర్యాలగూడ ఎమ్మెల్యే భాస్కరరావు నోటి దురుసు గురించి చర్చ మొదలైంది. బీసీ సంఘాలు ఆయనపై తీవ్ర ఆగ్రహం వ్యక్తం చేశాయి. కొందరైతే ఎమ్మెల్యేకు ఫోన్లు చేసి నిరసన వ్యక్తం చేశారట. రెండు రోజులపాటు ఎప్పుడు ఏ ఫోన్ వస్తుందో.. ఎవరికి క్షమాపణలు చెప్పాల్సి వస్తుందోనన్న ఆందోళన ఆయనలో కన్పించిందని అనుచరులే చెప్పారు. సారీ.. ఆ ఒక్కటి పట్టించుకోవద్దు దీంతో పరిస్థితి చేయిదాటిపోతుందని గ్రహించిన భాస్కరరావు క్షమాపణలు చెప్తూ వీడియో విడుదల చేశారు. తాను కావాలని ఆ వ్యాఖ్యలు చేయలేదని మరోసారి సంజాయిషీ ఇచ్చుకున్నారు. ఎప్పుడూ వివాదాలకు దూరంగా ఉండే ఎమ్మెల్యే.. కొంతకాలంగా పదే పదే నోరు జారడానికి ఆయనలో పెరుగుతున్న టెన్షన్ కారణం కావచ్చనే వాదనలు వినిపిస్తున్నాయి. వచ్చే ఎన్నికల్లో టికెట్ వస్తుందా? రాదా? అన్న అనుమానం ఒకటైతే.. సీపీఎంతో పొత్తు కుదిరితే మిర్యాలగూడ కేటాయించాల్సి వస్తే తన రాజకీయ భవిష్యత్తు ఏమౌతుందోనని భాస్కరరావు ఆందోళన చెందుతున్నారట.  దీంతో పాటు ఈసారి తన వారసుడిని రాజకీయాల్లోకి తీసుకురావాలని కూడా ఆయన అనుకుంటున్నారట. ఈ నేపథ్యంలో సీటు సీపీఎంకు కేటాయిస్తే.. ఇటు తన రాజకీయ జీవితం ప్రశ్నార్థకంగా మారడంతో పాటు కొడుకు రాజకీయ అరంగేట్రం కూడా ఆలస్యం అవుతుందన్న ఆందోళనే ఆయన నోరు జారుడుకు కారణంగా విశ్లేషిస్తున్నారు. పైగా తరచుగా వివాదాల్లో చిక్కుకోవడంతో పార్టీలో ఆయన వ్యతిరేక వర్గం నేతలు సంబరాలు చేసుకుంటున్నారట. ఓ నేత అయితే ఏకంగా తన అనుచరులకు పార్టీ ఇచ్చారని మిర్యాలగూడలో ప్రచారం సాగింది.  ఒకనాడు జానారెడ్డి అధికారాన్ని అడ్డం పెట్టుకుని చక్రం తిప్పిన నల్లమోతు భాస్కరరావు ఇప్పుడు ప్రతీ దానికి.. ఫోన్ చేసిన ప్రతీ వ్యక్తికి క్షమాపణలు చెప్పాల్సి రావడం అంటే.. ఆయన స్వయంకృతాపరాధమని కొందరు వ్యాఖ్యానిస్తున్నారు. ఎమ్మెల్యే నోటి దురుసుతనానికి తగిన మూల్యం చెల్లించుకుంటున్నారని ప్రత్యర్థులు పండుగ చేసుకుంటున్నారు.  -పొలిటికల్‌ ఎడిటర్‌, సాక్షి డిజిటల్‌

సాక్షి, హైదరాబాద్‌ : మిర్యాలగూడ ఎమ్మెల్యే నల్లమోతు భాస్కర్‌రావు భూ కబ్జాలను అడ్డుకున్నందుకు తన కుటుంబ సభ్యులపై కేసులు బనా యించి వేధిస్తున్నారని మిర్యాలగూడ పట్టణానికి చెందిన బంటు మణెమ్మ గురువారం హైదరాబాద్‌లో రాష్ట్ర మానవ హక్కుల కమిషన్‌ (హెచ్‌ఆర్‌సీ) లో ఫిర్యాదు చేశారు. ఎమ్మెల్యే భాస్కర్‌రావు, మిర్యాలగూడటౌన్‌ పోలీసులు కుమ్ముక్కై తమను వేధిస్తున్నారని ఈ సందర్భంగా ఆమె ఆరోపించారు. ఎమ్మెల్యే, పోలీసుల నుంచి తమకు ప్రాణహాని ఉందని ఫిర్యాదులో పేర్కొన్నారు. తన కుటుంబ సభ్యులంతా ప్రాణాలు గుప్పిట్లో పెట్టుకుని జీవిస్తున్నామని, ఎప్పుడేం జరుగుతుందోనని భయాందోళన చెందుతున్నామని వివరించారు. ఎమ్మెల్యే, అతడి అనుచరులు సాగిస్తున్న భూ కబ్జాలను అడ్డుకుని బాధితులకు అండగా నిలిచిన తన భర్త, న్యాయవాది బుచ్చిబాబును తప్పుడు కేసుల్లో ఇరికించి వేధిస్తున్నట్లు తెలిపారు. (విలాసాల లేడీ.. రూ.4కోట్ల మోసం) ఎమ్మెల్యే ఒత్తిడితో మిర్యాలగూడ పోలీసులు తమ ఇంట్లోకి చొరబడి ముఖ్యమైన ఫైళ్లు, కాగితాలు, పాస్‌ పుస్తకాలు, దస్తావేజులతో పాటుగా కీలకమైన పత్రాలను లాక్కెళ్లారని ఆమె వివరించారు. తన భర్త, కుమారుడిని పోలీస్‌స్టేషన్‌కు తీసుకెళ్లి విచక్షణారహితంగా కొట్టారని మండిపడ్డారు. అక్రమ కేసులు బనాయించిన మిర్యాలగూడ పోలీసులు, వేధింపులకు కారణమైన ఎమ్మెల్యే భాస్కర్‌రావుపై చట్టపరమైన చర్యలు తీసుకోవాలని కోరారు.

సాక్షి, మిర్యాలగూడ : మిర్యాలగూడలో గులాబీ జెండా ఎగురవేసి కేసీఆర్‌కు కానుకగా ఇస్తామని మాజీ ఎమ్మెల్యే, టీఆర్‌ఎస్‌ అభ్యర్థి నల్లమోతు భాస్కర్‌రావు అన్నా రు. ఆదివారం స్థానిక సంతోష్‌నగర్‌లో ఎన్నికల ప్రచారం నిర్వహించారు. ఈ సందర్భంగా ఆయన మాట్లాడుతూ కేసీ ఆర్‌ చేపట్టిన అభివృద్ధి సంక్షేమ పథకాలకు ప్రజల్లో అపూర్వ స్పందన కనిపిస్తుందన్నారు. అభివృద్ధి, సంక్షేమ పథకాలే మళ్లీ టీఆర్‌ఎస్‌ను అధికారంలోకి తీసుకవస్తాయని ధీమా వ్యక్తం చేశారు. కార్యక్రమంలో టీఆర్‌ఎస్‌ పట్టణ అధ్యక్షుడు తిరునగరు భార్గవ్, కౌన్సిలర్‌ వంగాల నిరంజన్‌రెడ్డి, ఎఎంసీ వైస చైర్మన్‌ శ్రీనివాస్‌రెడ్డి, నాయకులు సైదులుబాబు, వీరారెడ్డి, షోయాబ్, వహిద్, ఇమ్రాన్, అనిల్, పద్మావతి పాల్గొన్నారు.  భాస్కర్‌రావు సతీమణి ప్రచారం.. భాస్కర్‌రావు సతీమణి జయ ఆదివారం పట్టణంలోని హనుమాన్‌పేట, ఈదులగూడ ప్రాంతాల్లో ఎన్నికల ప్రచారం నిర్వహించారు. ఆమె వెంట ధూళిపాల కళావతి, దేవకమ్మ, శ్రీనివాస్‌రెడ్డి, లింగా రెడ్డి, నాగరాజు, వెంకన్న పాల్గొన్నారు.  బాపూజీనగర్‌లో తనయుడి ప్రచారం.. భాస్కర్‌రావు తనయుడు నల్లమోతు సిద్ధార్థ ఆదివారం పట్టణంలోని బాపూజీనగర్, వడ్డెరిగూడెంలో ఎన్నికల ప్రచారం నిర్వహించారు. ఇంటింటికి తిరిగి కరపత్రాలు పంపిణీ చేశారు. ఆయన వెంట కౌన్సిలర్‌ అంజన్‌రాజు, నాయకులు కుర్ర విష్ణు, ముత్యం, శ్రీనివాస్, సైదులు, పెద వెంకటమ్మ, లింగమ్మ, శ్రీనివాస్‌రావు పాల్గొన్నారు.  టీఆర్‌ఎస్‌లో చేరిక.. మండలంలోని ఊట్లపల్లి గ్రామానికి చెందిన అంబేద్కర్‌ యూత్, యాదవ యూత్‌ ఆధ్వర్యంలో పలువురు యువకులు ఆదివారం స్థానిక పార్టీ కార్యాలయంలో నల్లమోతు భాస్కర్‌రావు సమక్షంలో టీఆర్‌ఎస్‌లో చేరారు. పార్టీలో చేరిన వారిలో మనోజ్, బొంగరాల సందీప్, నవీన్, సురేష్, మధు, రమేష్‌ ఉన్నారు. కార్యక్రమంలో మాజీ ఎమ్మెల్యే తిప్పన విజయసింహారెడ్డి, మండల అధ్యక్షుడు చింతరెడ్డి శ్రీనివాస్‌రెడ్డి, సైదులుయాదవ్, మనోహర్‌రెడ్డి తదితరులు  పాల్గొన్నారు.  మరిన్ని వార్తాలు...


  ఎన్నికలకు ముందు నియోజకవర్గ ప్రజలకు ఇచ్చిన మాట ప్రకారం అన్ని గ్రామాలకు కృష్ణా మంచినీటిని అందించడానికి కృషి చేస్తా. ప్రణాళికాబద్ధంగా అన్ని శాఖల అధికారులతో ఎప్పటికప్పడు సమీక్ష సమావేశాలు నిర్వహించి అభివృద్ధికి కృషి చేస్తా. రాష్ట్రంలో టీఆర్‌ఎస్ ప్రభుత్వం ఉన్నప్పటికీ వారితో సఖ్యతతో ఉండి మిర్యాగూడ నియోజకవర్గానికి అధిక నిధులు వచ్చేలా కృషి చేస్తా. నాగార్జునసాగర్ ఎడమ కాలువ ఆయకట్టు పరిధిలో అతిపెద్ద పట్టణంగా ఉన్న మిర్యాలగూడను జిల్లా కేంద్రంగా ఏర్పాటు చేయడానికి కృషి చేస్తా. ఇందుకు ఇక్కడ అన్ని రకాల అవకాశాలు ఉన్నాయి. మిర్యాలగూడ పట్టణంలో ఎంతో కాలంగా ఉన్న కేఎన్‌ఎం డిగ్రీ కళాశాల సమస్యను అతి త్వరలో పరిష్కరిస్తా. కళాశాలలో అవసరం మేరకు ఉద్యోగులను ప్రభుత్వ పరం చేయడానికి ప్రయత్నిస్తా. అవసరమైతే అసెంబ్లీలో కేఎన్‌ఎం కళాశాల గురించి మాట్లాడుతా.
  
  పట్టణ అభివృద్ధిపై ప్రత్యేక శ్రద్ధ
  మిర్యాలగూడ పట్టణంలోని అన్ని వార్డులతో పాటు అన్ని కాలనీలు పర్యటించి వాస్తవంగా ఎక్కడ మంచినీటి సమస్య ఉందో తెలుసుకుంటా. పట్టణ ప్రజానీకానికి రాబోయే 20 సంవత్సరాలకు సరిపడా మంచినీటి పథకాన్ని రూపొందించి మంజూరు చేయిస్తా. పట్టణ ప్రజలకు తాగునీటి సమస్యలేకుండా పరిష్కరిస్తా. అదే విధంగా పట్టణంలో అసంపూర్తిగా ఉన్న భూగర్భ డ్రెయినేజీ నిర్మాణానికి నిధులు మంజూరు చేయించి పూర్తి చేయిస్తా. పట్టణంలో మహిళా డిగ్రీ కళాశాలతో పాటు బాలికల జూనియర్ కళాశాలను ఏర్పాటు చేయిస్తా. పట్టణంలోని సాగర్ రోడ్డులో ఆరులేన్ల రోడ్డుగా విస్తరణ చేపడతా. రాజీవ్‌చౌక్ నుంచి సాగర్ రోడ్డులోని రైల్వే ట్రాక్ వరకు ఆరులేన్ల రోడ్డువిస్తరణ చేయిస్తా.
  
  సాగునీటికి ప్రాధాన్యం
  నియోజకవర్గంలో సాగునీటికి అధిక ప్రాధాన్యమిచ్చి రైతులకు మేలు చేయడానికి కృషి చేస్తా. దామరచర్ల మండలంలో కృష్ణానదిపై రెండు చోట్ల ఎత్తిపోతల పథకాలను కొత్తగా నిర్మించడానికి నిధులు మంజూరు చేయిస్తా. వజీరాబాద్, ముదిమాణిక్యం మేజర్ల లైనింగ్ పూర్తి స్థాయిలో చేయిస్తా. అదే విధంగా వేములపల్లి మండలంలోని ఎడమ కాలువపై ఉన్న ఎత్తిపోతల పథకాలను పూర్తి స్థాయిలో ఆధునికీకరణ చేయిస్తా. అదే విధంగా మూసీ కాలువలు ఆధునికీకరించి చివరి భూములకు సాగు నీరందే విధంగా ప్రయత్నం చేస్తా.
  
  భీమారం - సూర్యాపేట రోడ్డు అభివృద్ధికి పాటుపడతా
  మిర్యాలగూడ నియోజకవర్గంలో ప్రధానంగా ఉన్న భీమారం - సూర్యాపేట రోడ్డు అభివృద్ధికి కృషి చేస్తా. ఆ రోడ్డును డబుల్ రోడ్డుగా చేస్తూ రూ. 25 కోట్లతో నిర్మిస్తా. అదే విధంగా వేములపల్లి మండలంలోని కామేపల్లి వద్ద ఉన్న కాజ్‌వే నిర్మిస్తా. ఇంకా నియోజకవర్గంలో అంతర్గత రోడ్ల నిర్మాణానికి నిధులు మంజూరు చేయిస్తా.
  
  లోఓల్టేజీ సమస్యను పరిష్కరిస్తా
  ముఖ్యంగా వేములపల్లి మండలంలో లోఓల్టేజీ సమస్య తీవ్రంగా ఉంది. ఆ సమస్యను అధిగమించడానికి అవసరమైన చోట సబ్‌స్టేషన్లు నిర్మించి సమస్య పరిష్కారానికి కృషి చేస్తా. మిర్యాలగూడ, దామరచర్ల మండలాల్లో కూడా లోఓల్టేజీ సమస్యను పరిష్కరించడానికి విద్యుత్ అధికారులతో చర్చించి నిధులు విడుదల చేయిస్తా. నియోజకవర్గాన్ని అభివృద్ధి పథంలో నడిపించడానికి అన్ని వర్గాల ప్రజలు సహకారం అందించాలి.