= గిద్దలూరు ఎమ్మెల్యే  అశోక్‌రెడ్డికి వ్యతిరేకంగా అన్నా వర్గీయుల నినాదాలు
  = 500 మందితో ఒంగోలుకు ర్యాలీ
  = మంత్రి శిద్దా, దామచర్ల, మాగుంటలకు ఫిర్యాదు
  
  
 టీడీపీ ఎత్తు: ప్రతిపక్ష ఎమ్మెల్యేలను కొనుగోలు చేసి బుట్టలో వేసుకుంటే.. ఇంకా తిరుగు ఉండదని.. అసెంబ్లీ మొత్తం చేతుల్లోకి వస్తుందని.. రాష్ట్రంలో ఏకఛత్రాధిపత్యం సాధించవచ్చని.
  
 యాక్షన్ ప్లాన్: జిల్లాలో కొంతమంది వైఎస్సార్ సీపీ ఎమ్మెల్యేలతో పాటు గిద్దలూరు శాసనసభ్యుడు ముత్తుముల అశోక్‌రెడ్డి ఈ మధ్యనే టీడీపీ కండువా కప్పుకున్నారు.
 
 రియూక్షన్: ఇప్పటికే టీడీపీ గిద్దలూరు ఇన్‌చార్జిగా వ్యవహరిస్తున్న అన్నారాంబాబు వర్గం అగ్గిమీద గుగ్గిలం అయింది. అధిష్టానంతోనే ఢీ అంటే ఢీ అంది. బుధవారం 500 మంది అనుచరులతో అన్నా.. జిల్లా కేంద్రానికి చేరుకొని అమీతుమీకి సిద్ధమయ్యారు.
  
 సాక్షి ప్రతినిధి, ఒంగోలు: గిద్దలూరులో టీడీపీ రాజకీయాలు రోడ్డెక్కాయి. అధికార పార్టీలో చేరిన ఎమ్మెల్యే ముత్తుముల అశోక్‌రెడ్డి..  పాత టీడీపీ కార్యకర్తలపై తప్పుడు కేసులు పెట్టిస్తున్నారని, అభివృద్ధి పనులన్నీ తమ వర్గీయులకే కేటాయించాలని అధికారులను బెదిరిస్తున్నాడని, ఫీల్డు అసిస్టెంట్లను, జన్మభూమి కమిటీ సభ్యులను తమ వారినే నియమించాలంటూ ఒత్తిడి చేస్తున్నారని ఆరోపిస్తూ మాజీ ఎమ్మెల్యే,  టీడీపీ నేత అన్నా రాంబాబు తీవ్రస్థాయిలో ధ్వజమెత్తారు. అశోక్‌రెడ్డితో అమీతుమీకి సిద్ధమయ్యారు. 500 మందికిపైగా తన అనుచరులతో బుధవారం ఒం గోలుకు తరలివచ్చారు. మంత్రి శిద్దా రాఘవరావు, పార్టీ జిల్లా అధ్యక్షుడు, ఎమ్మెల్యే దామచర్ల జనార్దన్, ఎమ్మెల్సీ మాగుంట శ్రీనివాసులరెడ్డి ఇళ్లను ముట్టడించారు.
  
  సీన్ - 1
 ముందుగా అన్నా అనుచరులు మంత్రి శిద్దా రాఘవరావు ఇంటికి వద్దకు చేరుకున్నారు. దామచర్ల జనార్దన్ సైతం అక్కడే ఉన్నారు. అశోక్‌రెడ్డికి వ్యతిరేకంగా తీవ్ర ఆరోపణలు చేస్తూ నినాదాలతో హోరెత్తించారు. 30 ఏళ్లుగా పార్టీని నమ్ముకున్న కార్యకర్తలను అన్యాయం చేసి నడివీధిలో నెట్టారంటూ పార్టీపై దుమ్మెత్తిపోశారు. కేకలు, ఈలలతో ఆ ప్రాంతం హోరెత్తిపోయింది. అన్నాను పిలిచి.. మంత్రి, జనార్దన్‌లు చర్చలు జరిపారు. ఆ తర్వాత ఆయన బయటకు వచ్చి కార్యకర్తలతో మాట్లాడారు. పార్టీ జెండాలు మోసిన వారికి తీవ్ర అన్యాయం చేశారని, కొత్తగా పార్టీలో చేరిన వారు అంతా తామేనంటూ పెత్తనం చలాయిస్తున్నా.. తాము చేతగాని వాళ్లలా కూర్చోవలసి వచ్చిందంటూ ఆవేదన వ్యక్తం చేశారు.
  
  సీన్ - 2
 అనంతరం అన్నా అనుచరులు  ర్యాలీగా ఎమ్మెల్సీ మాగుంట శ్రీనివాసులరెడ్డి ఇంటికి చేరుకున్నారు.  నినాదాలతో రచ్చ రచ్చ చేశారు. ఇంట్లో ఉన్న మాగుంట అన్నాతో పాటు ముఖ్యనేతలను పిలిచి చర్చలు జరిపారు. అశోక్‌రెడ్డి.. అన్నా అనుచరులకు వ్యతిరేకంగా చేపట్టిన కార్యకలాపాలను వివరించారు. ముఖ్యమంత్రితో మాట్లాడి న్యాయం చేయకపోతే తాము రోడ్డెక్కాల్సి వస్తుందని తేల్చి చెప్పారు. మాగుంట బయటకు వచ్చి అన్నా అనుచరులనుద్దేశించి ప్రసంగించారు. ఎమ్మెల్యేలను పార్టీలో చేర్చుకునే విషయంలో జిల్లా నేతల ప్రమేయం లేదన్నారు. దీనివల్ల పార్టీలో గందరగోళం వచ్చిన మాట వాస్తవమేనన్నారు. అశోక్‌రెడ్డి దూకుడు పార్టీకి తీవ్ర నష్టం చేకూరుస్తుందని త్వరలోనే నిర్ణయం తీసుకోవాలని వారంతా మాగుంటను కోరారు.
  


 - రాష్ట్రానికి ప్రత్యేక హోదా ఇచ్చేవరకు పోరాటం   
 - వైఎస్సార్‌సీపీ జిల్లా అధ్యక్షుడు ముత్తుముల అశోక్‌రెడ్డి
 కంభం : ప్రత్యేక హోదా ఆంధ్రుల హక్కు.. రాష్ట్రానికి ప్రత్యేక హోదా సాధించే వరకు పోరాటాలు తప్పవని వైఎస్సార్‌సీపీ జిల్లా అధ్యక్షుడు, గిద్దలూరు ఎమ్మెల్యే ముత్తుముల అశోక్‌రెడ్డి అన్నారు. బుధవారం స్థానిక్ ఆర్‌అండ్‌బీ అతిథిగృహంలో కంభం, అర్ధవీడు మండలాల వైఎస్సార్‌సీపీ నాయకులు, కార్యకర్తల సమావేశం నిర్వహించారు. ఈ సందర్భంగా ఆయన మాట్లాడుతూ అబద్ధపు హామీలు ఇచ్చి అధికారంలోకి వచ్చిన తెలుగుదేశం ప్రభుత్వం రాష్ట్ర ప్రజలకు తీరని ద్రోహం చేస్తోందన్నారు. ప్రత్యేక హోదాతోనే రాష్ట్రం అభివృద్ధి చెందుతుందని తెలిసి కూడా ప్రభుత్వం ఆ దిశగా చర్యలు చేపట్టడం లేదని విమర్శించారు.
 
 రాష్ట్రానికి ప్రత్యేక హోదా కోసం పోరాడుతున్న వైఎస్ జగన్‌మోహన్‌రెడ్డిని విమర్శించడమే పనిగా పెట్టుకున్న టీడీపీ నాయకులకు ప్రజలే బుద్ధి చెబుతారని పేర్కొన్నారు. రాష్ట్రానికి ప్రత్యేక హోదా వస్తే పెట్టుబడిదారులు ముందుకొస్తారని, నిరుద్యోగులు, కార్మికులకు ఉపాధి దొరుకుతుందన్నారు. ప్రత్యేక హోదా కోసం వైఎస్ జగన్‌మోహన్‌రెడ్డి గుంటూరులో తలపెట్టిన దీక్షకు ప్రభుత్వం అనుమతి నిరాకరించడం సిగ్గుచేటన్నారు. ఉద్యమాలను ఉధృతం చేస్తే ప్రభుత్వాలు వాటంతట అవే దిగొస్తాయని పేర్కొన్నారు. సమావేశంలో వైఎస్సార్ సీపీ జిల్లా జాయింట్ సెక్రట రీ సయ్యద్ ఖమర్, అర్ధవీడు మండల కన్వీనర్ ఏరువు రంగారెడ్డి తదితరులు పాల్గొన్నారు.


 - ప్రత్యేకహోదా వచ్చే వరకు వైఎస్సార్ సీపీ పోరాటం
 - జగన్ దీక్షకు ప్రతి ఒక్కరూ తరలిరావాలి
 - వైఎస్సార్ సీపీ జిల్లా అధ్యక్షుడు ముత్తుముల
 
 ఒంగోలు అర్బన్ : రాష్ట్రానికి ప్రత్యేక హోదా ఆంధ్రుల హక్కు అని వైఎస్సార్ సీపీ జిల్లా అధ్యక్షుడు, గిద్దలూరు ఎమ్మెల్యే ముత్తుముల అశోక్‌రెడ్డి అన్నారు. స్థానిక పార్టీ జిల్లా కార్యాలయంలో శుక్రవారం ఏర్పాటు చేసిన విలేకరుల సమావేశంలో మాట్లాడారు. రాష్ట్రంలో పరిశ్రమలు రావాలన్నా..నిరుద్యోగ సమస్య తీరాలన్నా ప్రత్యేక హోదా తప్పనిసరి అన్నారు. తమ పార్టీ అధ్యక్షుడు వైఎస్ జగన్‌మోహన్‌రెడ్డి ప్రత్యేక హోదాపై ఇప్పటికే మంగళగిరి, ఢిల్లీలో దీక్షలు చేశారని..ఇటీవలే రాష్ట్రబంద్ నిర్వహించి కేంద్రానికి సైతం రాష్ట్ర ప్రజల వాణి వినిపించామన్నారు. అయినా కేంద్ర, రాష్ట్ర ప్రభుత్వాల్లో చలనం రాకపోవడంతో వైఎస్ జగన్ గుంటూరులో ఈనెల 26వ తేదీన నిరవధిక దీక్షకు దిగుతారన్నారు. దీక్షకు అన్నివర్గాల ప్రజలు, మహిళలు, విద్యార్థులు, అన్ని రాజకీయ పార్టీలవారు మద్దతు తెలపాలని కోరారు.
  
 14న వైఎస్సార్ సీపీ విసృ్తత స్థాయి సమావేశం :
 
 ఈనెల 14వ తేదీన జిల్లా పార్టీ కార్యాలయంలో పార్టీ విసృ్తత స్థాయి సమావేశం నిర్వహిస్తున్నట్లు ముత్తుముల తెలిపారు. సమావేశానికి ఎంపీ వైవీ సుబ్బారెడ్డి, మాజీ మంత్రి, వైఎస్సార్ సీపీ రాష్ట్ర ప్రధాన కార్యదర్శి బాలినేని శ్రీనివాసరెడ్డి, జిల్లా పార్టీ పరిశీలకుడు గోవిందరెడ్డి, జిల్లాలోని వైఎస్సార్ సీపీ ఎమ్మెల్యేలు, నియోజకవర్గ ఇన్‌చార్జులు హాజరవుతారన్నారు. విలేకరుల సమావేశంలో పార్టీ నగర అధ్యక్షుడు కుప్పం ప్రసాద్, ప్రచార విభాగం జిల్లా అధ్యక్షుడు వేమూరి సూర్యనారాయణ, జిల్లా మహిళా అధ్యక్షురాలు గంగాడ సుజాత, నాయకుడు శింగరాజు వెంకట్రావు, గిద్దలూరు, బేస్తవారిపేట మండల పార్టీ అధ్యక్షులు కడప వంశీధరరెడ్డి, వేగినాటి ఓసూరారెడ్డి పాల్గొన్నారు.