బాలాసోర్‌: పూర్తి స్వదేశీ పరిజ్ఞానంతో అభివృద్ధి చేసిన, గగనతలం నుంచి గగనతలంలోని సుదూర లక్ష్యాలను ఛేదించగల ‘అస్త్ర’  క్షిపణిని శాస్త్రవేత్తలు బుధవారం విజయవంతంగా పరీక్షించారు. పశ్చిమబెంగాల్‌లోని కలైకుండా ఐఏఎఫ్‌ స్థావరం నుంచి సుఖోయ్‌–30యుద్ధవిమానం నుంచి దీన్ని ప్రయోగించగా నిర్దేశిత లక్ష్యాన్ని క్షిపణి అత్యంత కచ్చితత్వంతో ఛేదించింది. రక్షణరంగ పరిశోధన, అభివృద్ధి సంస్థ(డీఆర్‌డీవో)తో పాటు మరో 50 ప్రభుత్వ, ప్రైవేటు సంస్థలు ఈ క్షిపణి రూపకల్పనలో పాల్గొన్నాయి. ఈ ఆయుధాన్ని ప్రయోగించేందుకు వీలుగా సుఖోయ్‌–30 విమానాన్ని హాల్‌ ఆధునీకరించింది. 154 కిలోల బరువు, 3.57 మీటర్ల పొడవున్న అస్త్ర క్షిపణి 20 కి.మీ నుంచి 110 కి.మీ దూరంలో ఉన్న గాల్లోని లక్ష్యాలను ఛేదిస్తుంది. 15 కేజీల వార్‌హెడ్‌ను మోసుకుని 4.5 మ్యాక్‌(గంటకు 5556.6 కి.మీ) వేగంతో వెళ్తుంది.


 న్యూఢిల్లీ: భారత్ స్వదేశీ పరిజ్ఞానంతో రూపొందించిన అస్త్ర క్షిపణిని ఆదివారం విజయవంతంగా పరీక్షించినట్లు రక్షణ పరిశోధన, అభివృద్ధి సంస్థ(డీఆర్‌డీవో) వెల్లడించింది. దృష్టి క్షేత్రానికి ఆవల(బియాండ్ విజువల్ రేంజ్) గగనతలం నుంచి గగనతలంలోని లక్ష్యాలను ఛేదించే అస్త్ర క్షిపణిని వెస్ట్రన్ సెక్టార్‌లోని ఓ నౌకాదళ స్థావరం నుంచి సుఖోయ్-30 యుద్ధవిమానం ద్వారా వాయుసేన పరీక్షించిందని, ఈ పరీక్ష అన్ని రకాలుగా విజ యవంతమైందని డీఆర్‌డీవో అధికారులు ప్రకటించారు. పరీక్ష విజ యవంతం కావడంపై శాస్త్రవేత్తలను డీఆర్‌డీవో చీఫ్ అవినాశ్ చందర్ అభినందించారు. త్వరలో అస్త్ర క్షిపణికి వాస్తవ లక్ష్య ఛేదన పరీక్ష నిర్వహించనున్నామని, తర్వాత స్వదేశీ తేలికపాటి యుద్ధవిమానం తేజస్‌లో అమర్చనున్నామని తెలిపారు. అస్త్ర క్షిపణిని సుఖోయ్-30 యుద్ధ విమానం ద్వారా ప్రయోగించడం యుద్ధవిమానాల్లో క్షిపణి అమరికకు సంబంధించి కీలక మైలురాయని అన్నారు.
  
 ఈ క్షిపణికి మరిన్ని ప్రయోగాత్మక పరీక్షలు నిర్వహించనున్నట్లు తెలిపారు. కాగా, భారత్ స్వదేశీయంగా రూపొందించిన తొలి బీవీఆర్ ఎయిర్-టు-ఎయిర్ మిసైల్ అయిన అస్త్ర అన్ని రకాల వాతావరణ పరిస్థితుల్లోనూ పనిచేస్తుంది. గగనతలంలో సుమారు 20 కి.మీ. నుంచి 80 కి.మీ. దూరంలోని లక్ష్యాలను ధ్వంసం చేస్తుంది.