న్యూఢిల్లీ: ప్రభుత్వ రంగం బ్యాంకు  దేనా బ్యాంక్ తొలి త్రైమాసికంలో  నిరుత్సాహకర ఫలితాలను నమోదు చేసింది.  ప్రస్తుత ఆర్థిక సంవత్సరం తొలి త్రైమాసికం(క్యూ1)లో   ఏకంగా రూ. 279 కోట్లమేర నికర నష్టాలు ప్రకటించింది. గత(2015-16) క్యూ1లో రూ. 15 కోట్ల నికర లాభం ఆర్జించింది. మొత్తం ఆదాయం రూ 2,907.35 కోట్లకు తగ్గింది గత ఆర్థిక సంవత్సరం ఇదే త్రైమాసికంలో రూ 2,914.87 కోట్లు. మొండిబకాయిలు(ఎన్‌పీఏలు) 9.98 శాతం నుంచి 11.88 శాతానికి పెరిగాయి. నికర ఎన్‌పీఏలు కూడా 6.35 శాతం నుంచి 7.65 శాతానికి ఎగశాయి. మొండిబకాయిలకు ప్రొవిజన్లు రూ. 325 కోట్ల నుంచి ఏకంగా రూ. 665 కోట్లకు జంప్‌చేశాయి. ఫలితాలు నిరాశ పరచినప్పటికీ పీఎస్‌యూ బ్యాంకు షేర్లకు డిమాండ్‌ ఊపందుకోవడంతో ఈ కౌంటర్ కూడా లాభపడింది. బీఎస్‌ఈలో దేనా బ్యాంక్‌ షేరు 3 శాతం బలపడి రూ. 37.30కు చేరింది.